ပုပ္ပါးသီလတောင်မဟာကဿပလိုဏ်ဂူတော်

သီလတောင်ပေါ်ရှိရတနာသုံးသွယ်ပြည်တော်အေး ကျောက်စိမ်းစေတီ (ပုံ-၁)

ဗုဒ္ဓမြတ်စွာဘုရားရှင်နှင့် ရဟန္တာအရှင်မြတ်များ၊ ပုဂ္ဂိုလ်ထူးပုဂ္ဂိုလ်မြတ်များ သီတင်းသုံးတော်မူမည့် မဟာကဿပလိုဏ်ဂူတော်ကြီးကို ဆရာတော်ကြီးဘဒ္ဒန္တကုမာရအားကျေးဇူးဆပ်သောအားဖြင့် ဆရာတော်ကြီးဘဒ္ဒန္တကဝိန္ဒ သည် ၁၃၃၇ ခု သီတင်းကျွတ်လပြည့်ကျော် ၃ ရက် ဗုဒ္ဓဟူးနေ့(22.10.1975) တွင်မြေပြင်ပြီးတန်ဆောင်မုန်းလပြည့်(17.11.1975)နေ့တွင်ပန္နက်တင်မင်္ဂလာဆင်ယဉ်၍စတင်တည်  ဆောက်တော်မူပါသည်။

မဟာကဿပလိုဏ်ဂူတွင်းရှိ ဆရာတော်ကြီးဘဒ္ဒန္တကဝိန္ဒပုံတော်(ပုံ-၂)

ဆရာတော်ကြီးသည် ၁၃၆၀ ခု ပြာသိုလဆန်း ၁၄ ရက် (31.12.1998) နေ့တွင်ဘဝနတ်ထံပျံတော်မူသဖြင့် တည်ဆောက်ရေးလုပ်ငန်းများခေတ္တရပ်ဆိုင်းသွားခဲ့သည်။

ဆက်လက်ဆောင်ရွက်ခြင်း ။         ။၁၃၇၇ခု ဝါဆိုလပြည့်ကျော် ၉ ရက် (10.7.2015)နေ့မှစ၍ ကုမာရရာမကျောင်းတိုက်၊ ရေနံ့သာတောရပရိယတ္တိစာသင်တိုက်၊ ဇီဝိတဒါနအာရောဂျသာလာသံဃာ့ဆေးရုံတို့၏ ဦးစီးပဓါနနာယကဆရာတော် ဘဒ္ဒန္တပညာသာမိ(သဒ္ဒမဇောတိကဓဇ၊မဟာသဒ္ဒမဇောတိကဓဇ၊အဂ္ဂမဟာဇောတိကဓဇ) မှဦးဆောင်မှုပြု၍ ဝိဇ္ဇာဓရအသင်းတော်ကြီး၏နာယက ဦးစံဖေ၊အထွေထွေအတွင်းရေးမှုးဦးကျော်မိုးနိုင်တို့၏စီစဉ်ကြီးကြပ်မှု၊အလှူရှင်များစုပေါင်းပါဝင်လှူဒါန်းမှု တို့ဖြင့်ဆက်လက်ဆောင်ရွက်ခဲ့ပါသည်။

ဆရာတော် ဦးပညာသာမိအား 15.03.2023 နေ့ကဖူးတွေ့ရပုံ(ပုံ-၃)

လိုဏ်ဂူဝင်ပေါက် ၁၀ပေ ခန့်ကျယ်ပြီး အတွင်းတွင်မြတ်စွာဘုရား၊ ရှင်မဟာကဿပ၊ရဟန္တာ၊ ပုဂ္ဂိုလ်ထူးများ၊သီတင်းသုံးရန် အတော်အသင့်ကျယ်ဝန်းသည့်အဆောင်အခန်းများစွာရှိပါသည်။ ကျောက်တောင်ကိုထွင်း၍တည်ဆောက်ထားသည်မှာအံ့သြဖွယ်ဗိသုကာပညာရပ်ပင်ဖြစ်သည်။ ထူးခြားသည်မှာမဟာကဿပလိုဏ်ဂူတော်မှ သီလတောင်တော်ပေါ်သို့တက်နိုင်ရန်ကျောက်သားကိုထွင်းထုဖေါက်လုပ်ထားသည့်ဥမင်လှေခါးထစ်များတည်ဆောက်ထားခြင်းပင်တည်း။ မြန်မာတို့၏ကျောက်ထွင်းဗိသုကာနှင့် ဥမင်လိုဏ်တူးသည့် အင်ဂျင်နီယာအတတ်ပညာကိုထင်ရှားစွာတွေ့မြင်နိုင်သည်။

လိုဏ်ဂူတော် အဝင်ဝ ကမ္ဗည်းကျောက်စာ(ပုံ-၄)

“နိဗ္ဗာန်လှေခါး” ဟုအမည်ပေးထားသည်။အကျယ် ၅ပေခန့်၊အမြင့် ၆ပေခန့်ရှိပြီး လှေခါးထစ်ပေါင်း၁၃၀ ရှိသည်။ လက်ရမ်းနှစ်ဘက်ထားရှိပြီး အတန်မတ်စောက်သည်။ အမိုးနှင့်ဘေးနံရံများမပြိုကျစေရန်သံကူမြေထိမ်းနံရံ ( Retaining Wall) ဖြင့်တည်ဆောက်ထားသည်။ ရေစိမ့်ပေါက်များကို လုံရန် (Grouting )လုပ်ထားသည်။ လိုဏ်မုခ်ဝကိုတောင်အရပ်သို့လှည့်ထားသည်။ အလင်းနှင့်လေဝင်လေထွက်ကောင်းမွန်သည်။  လိုဏ်မုခ်ဝထိပ်တွင် ပဌာနဓါတုစေတီတည်ထားသည်။ ထိုမှအထက်တောင်ထိပ်တွင်ဘဒ္ဒကမ္ဘာဘုရားငါးဆူကိုသပ္ပါယ်စွာဖူးတွေ့တွေ့ရပေသည်။