သာကေတတံတား- ၁၉၆၆
ဟိုက်ဒြောလစ်စနစ်ဖြင့်ထောင်မ ၍ရသည့်ချောင်းကူးတံတားကြီး
ဒုတိယကမ္ဘာစစ်ကြီး မှာ ၁၉၃၉မှ ၁၉၄၅ တွင်အဆုံးသတ်သွားပေသည်။ နိုင်ငံအများစုမှာ စစ်ဒဏ်ကြောင့်ပြိုလဲပျက်စီးကုန်ကြလေသည်။ထို့ကြောင့်ပြန်လည်ထူထောင်ရေးလုပ်ငန်းများကိုမဖြစ်မနေ ဆောင်ရွက်ကြရတော့သည်။ဆေးရုံများ၊ကျောင်းများ၊ အုပ်ချုပ်ရေးပိုင်းဆိုင်ရာအဆောက်အဦများနှင့် လမ်းပမ်းဆက်သွယ်ရေး လုပ်ငန်းများကို အရင်ဆုံးဦးစားပေးအကောင်ထည်ဖေါ်ဆောက်လုပ်ကြရသည်။ ကိုလံဘိုစီမံကိန်းအနေဖြင့်မြန်မာနိုင်ငံတွင် တည်ဆောက်ရေးလုပ်ငန်းအမြောက်အများ အကောင်ထည်ဖေါ်ဆောင်သွားခဲ့သည်။ ဤကိုလံဘိုစီမံကိန်းကြီးထဲတွင် ပုဇွန်တောင်ချောင်း (ငမိုးရိပ်ချောင်းဟုလည်းခေါ်) ကူးတံတားကြီးလည်းအပါအဝင်ဖြစ်ပြီး သာကေတမြို့သို့ဆက်သွယ်ထား၍ သာကေတတံတားဟု အမည်ခေါ်တွင်ပေတော့သည်။
တည်နေရာ ။ ။ အထက်ပုဇွန်တောင်လမ်းမပေါ်ရှိ ပုဇွန်တောင် စာတိုက်၊ ပုဇွန်တောင်ဘူတာအနီးတည်ရှိသည်။ ပုဇွန်တောင်မှချောင်းတဖက်ကမ်းရှိ ဒေါပုံမြို့နှင့်သာကေတမြို့များသို့ဆက်သွယ်ပေးထားသည်။ တံတားအမည်မှာသာကေတတံတားဟုခေါ်သည်။ ကိုလံဘိုစီမံကိန်းအရ ကနေဒါအစိုးရအကူအညီဖြင့် ပြည်သူ့လုပ်ငန်းကော်ပိုရေးရှင်းကဆောက်လုပ်သည်။ Consultant Engineer အဖြစ် Whittaker Carswell & Co., Ltd ကတာဝန်ယူပါသည်။ သာမာန်မြစ်ကူးတံတားပုံစံထက် ပိုမိုသာလွန်သော မြစ်ကူး၊ လမ်းကူးတံတားဖြစ်သည်။ ချောင်းနှင့်အထက်ပုဇွန်တောင်လမ်း၊ မီးရထားလမ်းတို့သည်အပြိုင်ရှိပြီး တောင်နှင့်မြောက် တန်းလျက်ရှိသည်။ အရှေ့ဘက် သာကေတမြို့သစ် နှင့် အနောက်ဘက် စက်ရုံလမ်းတို့ကို ချောင်းနှင့် အထက်ပုဇွန်တောင်လမ်း၊ မီးရထားလမ်းတို့ ကိုဖြတ်၍ဆက်သွယ်ထားသည်။ စက်ရုံလမ်းမှ လေးထောင့်ကန်လမ်း၊ ကန်တော်ကြီးနတ်မောက်လမ်း သို့ဆက်ထား၏။
အရှေ့ဘက်သာကေတမှ မြစ်ကူးတံတားကိုကျော်ပြီး ဝဲဘက်ပုဇွန်တောင်စာတိုက်နှင့် ယာဘက် စက်ဆန်း၊ အတည့်သွားလျင်စက်ရုံလမ်းသို့ အသွားလမ်း၊ အပြန်လမ်းအဆင်ပြေသည့်ပုံစံဖြစ်သည်။ အထူးအားဖြင့်ပုဇွန်တောင်ချောင်းဖြတ်ကူးသည့် သာကေတတံတားကြီးသည် အလယ်မှ မ၍ရသည့် ရင်ကွဲတံတားကြီးဖြစ်ပြီး ထောင်မ၍ထားလျင် သင်္ဘောကြီးများဖြတ်သန်းနိုင်သည်။ဤသာကေတတံတားကြီးကို အထူးပုံစံထုတ်ပြီးတည်ဆောက်ထားခြင်းဖြစ်သည်။ တံတားကြီးကိုထောင်မ တော့မည်ဆိုလျင် ဦးစွာအချက်ပေးဥဩသံပေးသည်။ တံတားကြီးအောက်တဘက်တချက်ရှိ မော်တာကြီးများကိုမောင်း၍ Hydro lift စနစ်ကိုလည်ပါတ်စေသည်။ Hydro lift ထိုးတံကြီးများက တံတားကြီးကို မ တင်လေသည်။ သင်္ဘောကြီးများဖြတ်သန်းသွားပြီးနောက် တံတားကြီး ပြန်ချပြီးသော် မူလအတိုင်း ကားများဆက်လက်ဖြတ်သန်းလေတော့သည်။
ဤတံတားကြီးကို ၁၉၆၆ ခုနှစ်တွင်တည်ဆောက်ခဲ့ပြီး ၂၀၂၀ ခုနှစ်အထိအသုံးပြုခဲ့ပြီး လမ်းတံတားအင်ဂျင်နီယာ၊ စက်မှုအင်ဂျင်နီယာများလေ့လာနိုင်ရန်နှင့် ပြည်သူ့အပန်းဖြေပန်းခြံအဖြစ်ထားရှိလေသည်။ ယခုအခါ သာကေတ၊ ဒေါပုံမြို့များမှ အခြားမြို့များသို့ဆက်သွယ်ထားသည့်တံတားပေါင်းမှာ ၈ စင်းခန့်တည်ဆောက်ထားသည်။
Builder Mall
