မိုးကြိုးလွဲအကြောင်းမပြောမီ မိုးကြိုးပစ်ခြင်းအကြောင်းကို ဦးစွာပထမဖေါ်ပြပါမည်။ မိုးကြိုးပစ်ခြင်းဆိုသည်မှာ အချိန်တိုလျှပ်တပျက်အတွင်း အပူ၊ အလင်းနှင့် အလွန်မြင့်မားသည့်လျှပ်စစ်ပမာဏ ဖြတ်သန်းစီးဆင်းသွားခြင်းဖြစ်သည်။ မိုးကြိုးပစ်ခံရခြင်း ကြောင့် အပင်၊ လူ တိရစ္ဆာန် နှင့် နေအိမ်အဆောက်အဦများ၊ လျှပ်စစ်ပစ္စည်းများစွာတို့ ပျက်စီးခြင်းသို့ရောက်ကြရသည်။ အပူကြောင့် မီးလောင်ကျွမ်းသည်များလည်းရှိသည်။ကောင်းကင်တွင်ဖြစ်ပေါ်လာသည့် မိုးတိမ်များ၏ အောက်ခြေတွင် ရေငွေ့လှုပ်ရှားမှုကြောင့် Negative Charge ခေါ် လျှပ်စစ်အမဓါတ်များ စုဝေးဖြစ်ပေါ်လာသည်။ (ရှားရှားပါးပါး Positive Charge ခေါ် လျှပ်စစ်အဖိုဓါတ်များ စုဝေးသည်လည်းရှိတတ်ပါသည်။)
မိုးကြိုးအမျိုးအစားလေးမျိုးရှိသည်။
– တိမ်တိုက်တစ်ခုအတွင်း ထဲမှာပင်လျှပ်ကူးခြင်း (Cloud to itself – Intra – Cloud)
– တိမ်တိုက်တစ်ခုနှင့် အခြားတိမ်တိုက်တစ်ခုတို့ လျှပ်ကူးမှုဖြစ်ခြင်း (Cloud to Cloud-Intra-Cloud)
– တိမ်တိုက်မှမြေပြင်သို့ လျှပ်ကူးမှုဖြစ်ခြင်း (Cloud to Ground *CG)
– မြေပြင်မှ တိမ်တိုက်သို့လျှပ်ကူးမှုဖြစ်ခြင်း ( Ground to Cloud *GC ) တို့ဖြစ်သည်။ ထိုအမဓါတ်များ အင်အားကောင်းလာသည့်အခါ လှေခါးထစ်များပုံစံဖြင့် မြေပြင်သို့ ခုန်ဆင်း လေတော့သည်။ ထို့ကြောင့် မိုးကြိုးပစ်လျင်လှေခါးထစ်ပုံစံမြင်ရခြင်းဖြစ်လေသည်။ အမဓါတ်များ၏ ဆွဲဆောင်မှုကြောင့် မြေပြင်ရှိ Positive Charge ခေါ် အဖိုဓါတ်များက အရာဝတ္ထုများ၊ လူ၊ တိရစ္ဆာန်၊ သစ်ပင်၊ အဆောက်အဦများမှတဆင့် အလုအယက်ခုန်တက် ကြိုဆိုကြရာ လျှပ်စီးလမ်းကြောင်း တစ်ခုဖြစ်သွားသည်။
ဤလမ်းကြောင်းအတိုင်း တိမ်တိုက်ရှိအမဓါတ်များ နှင့်မြေပြင်မှအဖိုဓါတ်တို့ ပေါင်းဆုံကြသောအခါမှ မိုးကြိုးပစ်သည် ဟူ၍ဖြစ်လာသည်။ မိုးကြိုးပစ်ခံရ ခြင်းကြောင့် လူနှင့် တိရစ္ဆာန်များသေဆုံးရခြင်း၊ သစ်ပင်များနှင့် အဆောက်အဦများ မီးလောင်ကျွမ်းခြင်း၊ လျပ်စစ်ပစ္စည်း နှင့်အီလက်ထရောနစ်ပစ္စည်းများ ပျက်စီးဆုံးရှုံးကြရသည်။ မြောက်များစွာသောပျက်စီးခြင်းများနှင့် ကြုံရလေတော့သည်။ မိုးကြိုးအန္တရာယ်မှကာကွယ်ရန်အတွက် မိုးကြိုးလွဲကို တပ်ဆင်ကြခြင်းဖြစ်သည်။
မိုးကြိုးပစ်ခြင်းမှကာကွယ်နိုင်ရန်အတွက် အဆောက်အဦး၏အမိုး သို့မဟုတ် အဆောက်အဦအနီးရှိ အဆောက်အဦနှင့်မြင့်သော နေရာတွင် မိုးကြိုးလွဲခေါ် Lighting Arrester ကို တပ်ဆင်ကြခြင်း ဖြစ်လေသည်။ မိုးကြိုးလွဲဆိုသည်မှာ အဆောက်အဦများ၏ ထိပ်တွင်တပ်ဆင်ထားသည့် ၁ လက်မလုံးပါတ်ရှိသံချွန်တွင် ကြေးနီ(Copper) သို့မဟုတ် အလူမီနီ
ယမ် (Aluminium) နန်းကြိုးတုတ်တုတ်ကြီးဖြင့် ဆက်ထားပြီး ထိုနန်းကြိုး၏ ကျန်အစတစ်ဘက်ကို မြေကြီးတွင်ထည့်သွင်းမြှုပ်နှံထားခြင်းပင်ဖြစ်ပါသည်။
မိုးကြိုးလွဲအလုပ်လုပ်ပုံမှာ မြေပြင်သို့စီးလာသည့် လျှပ်စီးကြောင်းအား မြေကြီး အတွင်းသို့စီးဝင်နိုင်ရန် အလွယ်ကူဆုံးလမ်းကြောင်းကိုဖန်တီးပေးခြင်းပင်ဖြစ်သည်။ မိုးကြိုးလွဲတပ်ဆင်ရာတွင် အဆောက်အဦအမြင့်နှင့် အရွယ်အစားအလိုက် မိုးကြိုးလွဲအရေအတွက် တပ်ဆင်ရသည်။ ခေါင်မိုးအထက် အနည်းဆုံး ၃ ပေအမြင့်တွင်တပ်ရပါသည်။ မြေဓါတ် Earthing မိရန်နှင့် အသုံးပြုမည့်ကြေးကြိုးအရွယ်အစားမှာ အလွန်အရေးကြီးပါသည်။ နန်းကြိုးအလုံးသေးပါက ဖြတ်သန်းစီးဆင်းသော လျှပ်စစ်ပမာဏမှာ များပြားလှသည့်အတွက် နန်းကြိုးလောင်သွားနိုင်သည်။ Earthling Resistance သည် ၁၀ အုန်း(10 Ω ) အောက်တွင်ရှိရမည်။ ဓာတ်အားခွဲရုံနှင့် ဓာတ်အားလိုင်းများအတွက် Earthing Resistance သည် ၂ အုန်း (2 Ω) အထိရရှိဆောင်ရွက် ထားရန်လိုအပ်ပါသည်။ မြေတွင်းဓာတ်ပိုမိုရရှိမှု (Earthing Resistance) ကောင်းမွန်စေရေးအတွက် Earth ကျင်းတူးရာတွင် ၁ နေရာ တည်းသာမက ၂ နေရာ ၃ နေရာခန့်ကျင်းတူးပြီး Earthing Point များကိုပေါင်းထားခြင်း၊ သာမန်ကျင်းများထက် မြေအောက်အစိုဓာတ်ကောင်းစွာရသည့် Tube Well များတွင် Earth ချခြင်းကမိုးကြိုးလွဲအတွက်ပိုမို Earth မိစေသည်။
မိုးကြိုးလွဲတပ်ဆင်ရာတွင် ကျွမ်းကျင်ပညာရှင်များနှင့်တိုင်ပင်အပ်နှံသင့်ပါသည်။ လွဲမှားသောတွက်ချက်မှုများဖြင့်တပ်ဆင်ထားမိလျင် အကျိုးထက် အပြစ်ကပိုများသည်။ မိုးကြိုးလွဲကို ကျွမ်းကျင်ပညာရှင်များနှင့် စနစ်တကျတပ်ဆင်ထားခြင်းဖြင့် မိုးကြိုးဒဏ်ကြောင့် နေအိမ်တိုက်တာ အဆောက်အဦများ လျှပ်စစ်ပစ္စည်းများ ပျက်စီးခြင်းမှ ကောင်းစွာ ကာကွယ်ပေးပါသည်ဟု တင်ပြလိုက်ပါသည်။
Builder Mall
