အမိုးဧရိယာအလွယ်တကူတွက်နည်း

အမိုးဧရိယာတွက်နည်းကိုတင်ပြပေးလိုက်ပါတယ်။ အမိုးအမျိုးအစားပေါင်းများစွာ၊ပုံစံပေါင်းများစွာရှိပါတယ်။
ဓနိ၊သက်ကယ်၊ အုတ်ကြွပ်၊ ပျဉ်ကြွပ်၊ ဝါးကြွပ်၊ သွပ်၊ အလူဇင့် စသည်တို့၏ ဧရိယာတွက်နည်းမှာပုံစံတစ်မျိုးတည်းဖြစ်သည်။ Concrete roof slab ခေါ် ကွန်ကရိနှင့်မိုးခြင်းကတော့တွက်နည်းတစ်မျိုးနှင့်ဖြစ်ပါသည်။

   အမိုးဧရိယာမတွက်မီ ရှေးဦးစွာနေအိမ်၊ သို့မဟုတ် အဆောက်အဦ၏ အကျယ်အဝန်းကိုသိရပါမည်။ Detail Drawing / Floor Plan drawing/ Side View Drawing /ပုစံအကြမ်း စသည်ဖြင့်ရှိပါသည်။ ထို့အပြင် ၃ပင် ၂ခန်း တွင် အခန်းဖွင့် ၁၀ပေ၊ အခန်းဖွင့် ၁၅ပေ။ ၄ပင် ၃ခန်း အခန်းဖွင့် ၁၀ပေ၊ ၁၅ပေ စသည်ဖြင့်ရှိကြပါသည်။ ဤသည်ကား အဆောက်အဦ၏အကျယ်ပင်ဖြစ်သည်။ အကျယ်ရလျင်အမိုးအတွက်ရပေပြီ။ တံစက်မြိတ်အစွန်းဘယ်လောက်ထုတ်မည်နည်း ထည့်ပေါင်းရုံသာ။

၁။  တံစက်မြိတ် + အခန်းဖွင့်အကျယ်+ တံစက်မြိတ် = အမိုး၏ (အလျား)ဟုထားပါ။

၂။  တိုင်နှင့်ထုပ်တန်းသည် ထောင့်မှန်ကျနေပြီး ဒိုင်း၏အရှည်သည် အမိုး၏ အရှည်(အနံ) ပင်ဖြစ်သည်။

၃။  အမိုး၏ဧရိယာ = တံစက်မြိတ်၂ခုပေါင်း နှင့် ခန်းဖွင့်ပေါင်းခြင်း (အလျား) X ဒိုင်းအရှည်(အနံ)
ဤသည်မှာ ဒိုင်းတဖက်အတွက်သာဖြစ်သည်။ ၂ဘက်ချဆိုလျင်လည်း အခြားဒိုင်းတဘက်အတွက် အထက်ပါနည်းအတိုင်းတွက်ရုံသာ။ အဆောင်ဆောင်အခန်းခန်းဖြစ်စေကာမူ အဆောင်တစ်ဆောင်အတွက် ဒိုင်းအရှည်နှင့် ဒိုင်းအရေအတွက်(ခန်းဖွင့်+တံစက်မြိတ်) မြှောက်လဒ်သည် အမိုး၏ဧရိယာ ဖြစ်ပေတော့သည်။

၄ ပင် ၃ ခန်း အခန်းဖွင့် ၁၀ပေ တံစက်မြိတ် ၂ပေ ခေါင် ၂ဘက်ချ ကိုတွက်ကြည့်မည်။
၄ ပင်သည်တိုင် ၄ တိုင်ပါသည်ဟုဆိုလိုသည်။

၃ခန်း အခန်းဖွင့် ၁၀ပေ(တိုင်၂တိုင်ကြား၁ခန်း)= ၃ X ၁၀ = ၃၀ ပေ + တံစက်မြိတ်၂ပေ + တံစက်မြိတ်၂ပေ =၃၄
ဒိုင်းအလျား ၁၄ ပေ
အမိုးဧရိယာ = ၃၄ ပေx ၁၄ ပေ = ၄၇၆ စတုရန်းပေ (ဒိုင်း ၁ဘက် အမိုး ၁ဘက် အတွက်)
အခြား၁ဘက်အတွက် ဆိုလျင် ၄၇၆ x ၂ = ၉၅၂ စတုရန်းပေရသည်။
* မှတ်ချက်။ အလျော့တွက် ၁၀% နှင့် yellow book တွင် သစ် သံ လူဦးရေ စသည်တို့ကြည့်နိုင်ပါသည်။

ဤနည်းမှာမြန်မာ့ဗိသုကာမူပိုင်တွက်နည်းဖြစ်သည်။ နန်းဆောင်၊ ခန်းမ၊ ဘုံပျံ၊ ဘုံဆင့်များတွက်နည်းဖြစ်၏။

  ဓါတ်ပုံတွင်ဖေါ်ပြထားသည့်အမိုးလေးဘက်ချကို  Lay Out Plan Drawing ဖြင့်နမူနာတွက်ပြ ထားပါသည်။
အလျား 40’ အနံ 30’ ခေါင်ဆိုင်း(သို့မဟုတ်)ဒိုင်းအလျား 21.21’ နှင့် ထိပ်ခေါင်အုပ် 10’
1- . ထြာပီဇီယမ်ဧရိယာ =  ½ (ပြိုင်နား၂ခုပေါင်း x အမြင့်)
                            =   ½  (40’ + 10’) x 15’
                            =   375 sq ft + (10%) = 412.5 square feet (အလျော့တွက် 10% ထည့်တွက်ပါသည်)
2 – . ပုံစံတူ အခြား ၁ဘက် သည်လည်း 412.5 sq-ft
3 – . တြိဂံဧရိယာ =  √ S (S–a) (S-b) (S-c)
                            S =  ½ (a + b+ c)
                                 =  ½ (21.21 + 30 + 21.21)
                                 = 36.21
        တြိဂံဧရိယာ = √ S ( S-a ) ( S-b ) ( S-c)
                      = √ 36.21 (36.21- 21.21)(36.21-30)(36.21-21.21)
                      =    225 sq-ft
အလျော့တွက်10% =  225 + (10%) = 247.5 sq-ft
4 – . ပုံစံတူအခြား ၁ဘက်သည်လည်း 247.5 sq-ft
ထို့ကြောင့် အမိုးလေးဘက်ချ အတွက် 2(247.5) + 2(412.5) = 1320 sq-ft လိုအပ်ပါသည်။

 ခေါင်ဆိုင်းတွက်နည်း

Engineering ခေါင်အချိုးကို 5:12, 7:12 , 9: 12
စသဖြင့်ယူလေ့ရှိကြသည်။
ထောင့်မှန်တြိဂံ ပုံအတိုင်း တိုင်နှင့်ထုပ်သည်ထောင့်မှန်ကျပြီး ဒိုင်းသည် ထောင့်မှန်ခံအနားဖြစ်သည်။
5:12 အတွက် Shift > tan-1(5 ÷ 12) = 22.6°
7:12 အတွက် Shift > tan-1(7 ÷ 12) = 30.25°
9:12 အတွက် Shift > tan-1(9 ÷ 12) = 36.86° အခြေအနား (ထုပ်တန်း) နှင့် ဒိုင်း ကြားထောင့်ဖြစ်ပါသည်။ ဤသို့ဖြင့်
အမိုး၏ခေါင်အစောက်ကို သိရှိနိုင်ပါသည်။

              

အမိုးမိုးပုံအဆင့်ဆင့်

တိုင်ထောင်ပြီး ထုပ်၊ လျောက်၊ ဒိုင်း၊ မြား အဆင့်ပြီးပါကအမိုးမိုးနိုင်ပေပြီ။ အချို့မှာ ထုပ်ပတ် လျောက်ပတ် ပါတ်လည်ယူခြင်း။ မြားတန်းမထည့်ဘဲအမိုးမိုးခြင်းများလည်းရှိပါသည်။ 
1. အောက်ခံ ပြောင်အထပ်သားပြား မိုးခြင်း
2. ရေလုံအမိုးလိပ်များကိုဖြန့်၍ကပ်ပြီး  ရေကာပြားများ(Flashing) ဘောင်ကွပ်ခြင်း။
3. အပူခံပြား များ(Glass Wool/ Rock Wool/Sandwich Panel) ထပ်၍မိုးခြင်း။
4. နောက်ဆုံးတွင်မှ အုတ်၊ ပျဉ်၊ သစ်၊ ဝါး၊ သွပ်၊ အလူဇင့်စသည့် အမိုးအမျိုးအစားနှင့်ရွေးချယ်ထားသောအရောင်ပါ သည့်အမိုးပြား များကို အပေါ်မှထပ်အုပ်၍ မိုးကြသည်။

အင်္ဂတေဖြင့်မိုးခြင်း Concrete Roof Slab

အထက်ပါဧရိယာတွက်နည်းမှ မတူကွဲပြား သည်က ကွန်ကရိဖြင့်မိုးခြင်းပင်တည်း။ တွက်နည်းအနည်းငယ်ကွာသည်။ ဧရိယာတွက်နည်းတူသည်။ ထုထည်၊ ကွန်ကရိအချိုးအစား သိရလျင် တွက်နိုင်သည်။ ဘိလပ်မြေ၊ သဲ၊ ကျောက်ဘယ်လောက်ကုန်မည်။ ငွေဘယ်လောက်ကုန်မည်ခန့်မှန်းကုန်ကျစရိတ်တွက်နိုင်သည်။ Reinforce Bar(ထည့်သွင်းရမည့်သံချောင်းများ)၊ Form Works ခေါ်ကျောက်ပုံးနှင့် ထောက်တိုင်များအကြောင်းကိုထပ်မံရေးပါမည်။
ကွန်ကရိဖျော်စပ်ပုံအချိုးနှင့် မာဆင့်အလိုက်အဆင့်သတ်မှတ်ထားသည်။ Concrete grade, N/mm2 or MPa , လောင်းပြီး28 ရက်ကြာတွင်ရှိသည့် မာဆင့်အခြေနေတို့ကိုချန်ခဲ့ပါသည်။ Normal Grade M25,M20,M15,M10 & M7.5 concrete တို့အကြောင်းတင်ပြပါမည်။
ကွန်ကရိလောင်းပြီးကျန်ခဲ့သည့် ခြောက်သွေ့ကွန်ကရိနှင့် ဖျော်စပ်စဉ်ရေပါဝင်သည့်အစိုကွန်ကရိတို့မှာထုထည်မတူပါ 1 : 1.54 ဖြစ်သည်။ ၁ ကုဗမီတာ (အလျား၁မီတာ x အနံ၁မီတာ x အမြင့်၁မီတာ) Normal Grade M 25ခေါ် 25N/mm2 ဘိလပ်မြေ      သဲ၊ ကျောက်နှင့်ရေပါဝင်သော အစိုကွန်ကရိအတွက်
 ပမာဏ  ၁ ကုဗမီတာ
အချိုး    = 1 : 1 : 2

M 25     1:1:2  ဘိလပ်မြေ 0.385 m³ = 554 kgs  = 11 အိတ်
                     သဲ            0.385 m³ =  624 kgs =  18 ကုဗပေ 0.18 ကျင်း
                     ကျောက်    0.77 m³   =  1194 kg =  36 ကုဗပေ 0.36 ကျင်းလိုအပ်ပါသည်။

Builder Mall