ကရင်နှစ်သစ်ကူးနေ့
ခရစ်နှစ် ၂၀၂၄ခု ဒီဇင်ဘာလ ၃၀ ရက်နေ့သည် ၂၇၆၄ ခုနှစ် ကရင်အမျိုးသားနှစ်သစ်ကူးနေ့ ဖြစ်သည်။ ကရင်ခုနှစ်သက္ကရာဇ်ကိုသတ်မှတ်ရာ၌ ကရင်လူမျိုးများ မြန်မာနိုင်ငံသို့စတင်ရောက်ရှိခဲ့သည့် ဘီစီ ၇၃၉ မှစတင်ရေတွက်သည်။ ကရင်နှစ်၏ ပထမဆုံးလ၊ ပထမဆုံးသောရက်သည် ကရင်အမျိုးသား နှစ်သစ်ကူးနေ့ဖြစ်သည်။ မြန်မာပြက္ခဒိန်အရပြာသိုလ၏ပထမဆုံးရက်ဖြစ်သည့် ပြာသိုလဆန်း ၁ ရက်နေ့သည် ကရင်အမျိုးသားနှစ်သစ်ကူးနေ့ဖြစ်ပါသည်။
ကရင်အမျိုးသားနှစ်သစ်ကူးနေ့ကို အစိုးရအသိအမှတ်ပြုသတ်မှတ်နိုင်ရန်အတွက် အောက်လွှတ်တော်အမတ်များက လွှတ်တော်တွင် လက်မှတ်ရေးထိုးတောင်းဆိုခဲ့သည်။ ၁၉၃၆ ခုနှစ်တွင် ဒေါက်တာဘမော်ညွန့်ပေါင်းအစိုးရထံ ကရင်အမျိုးသားနေ့၊ ကရင်အမျိုးသားသီချင်း၊ ကရင်အမျိုးသားအလံ တို့ကိုသတ်မှတ်ပေးရန် မူကြမ်းတင်သွင်း တောင်းဆိုခဲ့ကြပါသည်။
အောက်လွှတ်တော်အမတ်များမှာ စောဂျွန်ဆင်ဒီဖိုးမင်း- တောင်ငူ၊ စောဆစ်ဒနီလူနီ- ပုသိမ်တောင်ပိုင်း၊ မန်းဘခိုင်- ပုသိမ်မြောက်၊ စောဖေသာ- မြောင်းမြအနောက်၊ မန်းကံအေး- မြောင်းမြအရှေ့၊ စောမြတ်သိန်း- ဟင်္သာတ၊ မန်းထွန်းခင်- မအူပင်မြောက်၊ မန်းရွှေညွန့်- မအူပင်တောင်၊ စောသာဒေွး- သထုံမြောက်၊ ဦးလှဖေ- သထုံတောင်၊ ဦးဖိုးမျှင်- ကျိုက္ခမီအရှေ့၊ စောဖိုးချစ်- ကျိုက္ခမီအနောက် တို့ဖြစ်ကြသည်။ ပူးပေါင်းကူညီဆောင်ရွက်ခဲ့ကြသည့် အထက်လွှတ်တော် အမတ်များမှာ စောစံစီဖိုး- တောင်ငူ၊ မန်းရွှေဘ- တောင်ငူ၊ ဆရာစံမော်- တောင်ငူ တို့ဖြစ်ကြပါသည်။ မူကြမ်းကို ၁၉၃၆ ခုနှစ်တွင် တင်သွင်းခဲ့ပြီး ယခုအခါအများပြည်သူရုံးပိတ်ရက်အဖြစ်သတ်မှတ်ပြီး ကရင်နှစ်သစ်ကူးပွဲကို စည်ကားသိုက်မြိုက်စွာကျင်းပကြသည်။
ကရင်အမျိုးသားနှစ်သစ်ကူးနေ့တွင် ပျော်ပွဲရွှင်ပွဲများကျင်းပခြင်း၊ ရိုးရာနတ်များကိုပူဇော်ခြင်း၊ လူကြီးမိဘများကိုကန်တော့ခြင်းများပြုလုပ်ကြသည်။ အထူးသဖြင့် ကရင်တောင်သူရုပ်ပြုလုပ်ဖန်တီးခြင်း ကထူးခြားသည်။ ကောက်သစ်စားပွဲနှင့်လည်းဆက်စပ်၍ ဆန်ရေစပါးပေါများစေရန်စောင့်ရှောက်သည့် ဖိဖုယော ခေါ် ပုဗ္ဗကြည်နတ် ကိုဂုဏ်ပြုချီးမွမ်းတေးသီချင်းသီဆိုခြင်းများလည်းပြုလုပ်ကြသည်။
