၇၈ နှစ်မြောက် ပြည်ထောင်စုနေ့ ၂၀၂၅ ဖေဖေါ်ဝါရီလ ၁၂ ရက်
မြန်မာနိုင်ငံသည် ဗြိတိသျှ အစိုးရလက်အောက်တွင် နှစ်ပေါင်းများစွာအုပ်ချုပ်ခံခဲ့ရပြီး ဗြိတိသျှ အစိုးရ၏ အုပ်ချုပ်ရေးပရိယာယ်ကြောင့် တိုင်းရင်းသားအချင်းချင်း ရင်းနှီးမှုမရှိဘဲ သွေးကွဲမှုပင် ရှိခဲ့သည်။ ဗြိတိသျှ အစိုးရ၏ လက်အောက်မှ လွတ်မြောက်ရန် နှစ်ပေါင်းများစွာ အမျိုးမျိုးအဖုံဖုံ ကြိုးပမ်းကြလေသည်။ ထိုသို့ကြိုးပမ်းရာတွင် မြေပြန့်နှင့်တောင်တန်းသားတို့ အတူပူးပေါင်း ဆောင်ရွက်ခဲ့ခြင်းမရှိကြချေ။ သို့ရာတွင် ဖက်ဆစ်ဂျပန်ကို တော်လှန်သောအခါတွင်မူကား တိုင်းရင်း သားများအားလုံး တညီတညွတ်တည်း တော်လှန်ခဲ့ကြလေသည်။ ဂျပန်တို့၏လက်အောက်မှ လွတ်မြောက်ပြီးနောက်လွတ်လပ်ရေးကိုဆက်လက်ကြိုးပမ်းရာတွင် လွတ်လပ်ရေး၏ ဖခင်ကြီး ဗိုလ်ချုပ်အောင်ဆန်းနှင့် မြန်မာ့ခေါင်းဆောင်ကြီးများ၏ ကြိုးပမ်းမှုကြောင့် လွပ်လပ်ရေး ကိုမျှော်မှန်း နိုင်သည့်အခြေအနေသို့ ဆိုက်ရောက်ခဲ့သည်။
၁၉၄၇ ခု ဇန်နဝါရိလ ၂၇ ရက်နေ့တွင်ချုပ်ဆိုခဲ့သော Aung San- Attlee Agreement တွင် ပြည်မတောင်တန်းပူးပေါင်းရန်သဘောတူပါက လွတ်လပ်ရေးပေးမည်ဟုပါရှိလေသည်။ ထို့ကြောင့် ဗိုလ်ချုပ်အောင်ဆန်းသည် ပြည်မတောင်တန်း ပေါင်းစည်းနိုင်ရေးအတွက် အထူးပင်ကြိုးပမ်းခဲ့လေ သည်။
ပင်လုံညီလာခံကြီးကို ရှမ်းပြည်တောင်ပိုင်း ပင်လုံမြို့ကြီးတွင် ၁၉၄၇ ခု ဖေဖေါ်ဝါရီလ ၇ ရက် နေ့မှစတင်၍ ကျင်းပခဲ့ရာ တိုင်းရင်းသားခေါင်းဆောင်များ စုံညီစွာတက်ရောက်ခဲ့ကြသည်။ ဖေဖေါ်ဝါရီလ ၁၂ ရက် နံနက် ၁၀ နာရီတွင် ဗိုလ်ချုပ်နှင့်အတူ ကချင်၊ ချင်း၊ ရှမ်း စသည့် အမျိုးသား ကိုယ်စားလှယ်ကြီး ၂၃ ဦးတို့သည် သာတူညီမျှ တလုံးတစည်းတည်းနေထိုင်ကြမည်ဟူသော သန္နိဌာန်ဖြင့် ပင်လုံစာချုပ်ကြီးကို လက်မှတ်ရေးထိုးကြပါသည်။ တိုင်းရင်းသားစည်းလုံးညီညွတ်မှုကို ပြသနိုင်ခဲ့သည်။
ပင်လုံစာချုပ် ချုပ်ဆိုသည့်နေ့ကို ပြည်ထောင်စုနေ့ဟုသတ်မှတ်ခဲ့ကြသည်။ ပြည်ထောင်စုနေ့ ကြီးသည် မြန်မာ့လွတ်လပ်ရေးသမိုင်းတွင် လွန်စွာမှအရေးပါလေသည်။ နှစ်စဉ်ဖေဖေါ်ဝါရီလ ၁၂ ရက် နေ့ကို ပြည်ထောင်စုနေ့အဖြစ်သတ်မှတ်ပြီး အထိမ်းအမှတ်ပွဲများ၊ ပျော်ပွဲရွှင်ပွဲများ ကျင်းပကြသည်။
၂၀၂၅ ခု ဖေဖေါ်ဝါရီလ ၁၂ ရက်နေ့သည် မြန်မာနိုင်ငံ၏ ၇၈ နှစ် မြောက်ပြည်ထောင်စုနေ့ကြီးပင် ဖြစ်ပါတော့သည်။ ပြည်ထောင်စုနေ့ သည် ကိုလိုနီလက်အောက်မှ လွတ်မြောက်၍ တောင်တန်းနှင့် ပြည်မ ပြည်ထောင်စုဖွားတိုင်းရင်းသားအားလုံး ပေါင်းစည်းညီညွတ်သည့် ပြည်ထောင်စုကြီး တည်ဆောက်သွားနိုင်ရေးအတွက် ချုပ်ဆိုခဲ့သော သမိုင်းဝင်နေ့ထူးနေ့မြတ်ကြီးပင် ဖြစ်ပါတော့သည်။
Builder Mall
